Կումանը` Բարսան մարզելու և Էլ Կլասիկոյի մասին (17/03/2015)

Սաութհեմփթոնի գլխավոր մարզիչ Ռոնալդ Կումանը հերթական անգամ հայտարարել է, որ ապագայում ցանկանում է գլխավորել կատալոնական Բարսելոնան: Որպես ֆուտբոլիստ Կումանը ժամանակին պաշտպանել է Բարսայի գույները` մեծ հաջողությունների հասնելով կատալոնական թիմի կազմում:

"Բոլորը գիտեն, թե ինչն է ինձ կապում Բարսելոնայի հետ: Եթե ապագայում ինձ հնարավորություն տրվի գլխավորել Բարսելոնան, ես միայն ուրախ կլինեմ", - ասել է Կումանը:

Ռոնալդ Կումանը խոսել է նաև Լա Լիգայի 28-րդ տուրի շրջանակներում կայանալիք Բարսելոնա - Ռեալ Մադրիդ հանդիպման մասին` նշելով, որ այդ խաղում Բարսելոնան բացահայտ ֆավորիտ է:

"Բարսան գտնվում է իր լավագույն մարզավիճակում, իսկ Ռեալին հաղթանակները հեշտությամբ չեն տրվում: Ռեալն այժմ խաղադաշտում չունի այն հանգստությունը, որն ունի Բարսելոնան: Եթե Ռեալի հետ խաղում Բարսան խաղաց իր ֆուտբոլն, ապա դժվար թե Ռեալը հաղթելու շանսեր ունենա", - ասել է հոլանդացի մասնագետը: