Ինյեստա. ««Մանչեսթեր Սիթիին» հաղթելուց հետո «Ռեալի» հետ հանդիպմանը մեզ ավելի վստահ կզգանք»

«Բարսելոնայի» կիսապաշտպան Անդրես Ինյեստան խոսել է Չեմպիոնների լիգայի 1/8 եզրափակչի «Մանչեսթեր Սիթիի» հետ պատասխան հանդիպման մասին:

«Չեմ կարող ասել, թե ինչ է կատարվում «Սիթիի» հետ, սակայն կարծում եմ՝ նա չի փոխվել: «Մանչեսթեր Սիթին» շատ ուժեղ թիմ է, ով բոլոր դիրքերում ունի բարձրակարգ խաղացողներ, եւ նրան հաղթելը շատ բարդ է: Վաղը նրանք կարող են ավելի վտանգավոր լինել, այդ պատճառով էլ պետք է առավելագույնս կենտրոնացած գործենք:

«Սիթիի» հետ հանդիպումը կարեւոր է նաեւ այն տեսանկյունից, որ այն «Ռեալի» դեմ խաղից առաջ մեզ վստահություն կարող է հաղորդել: Մենք հանդիպումից հանդիպում առաջ ենք շարժվում, եւ հաղթանակը մեզ համար շատ կարեւոր է: Հիանալի կլինի «Սիթիին» հաղթելուց հետո պատրաստվել «կլասիկոյին»:

Տեր Շտեգենը եւ Բրավոն տարբեր դարպասապահներ են, սակայն նաեւ ընդհանուր շատ բաներ ունեն: Մեր ակումբում նախապատվությունը տալիս են արագ դարպասապահներին, ովքեր կարողանում են ոտքերով խաղալ, եւ տեր Շտեգենն ու Բրավոն համապատասխանում են այդ պահանջներին: Մենք կրկին պետք է իդեալական հանդիպում անցկացնենք, պետք է գնդակին ավելի շատ տիրենք եւ մրցակցին ստիպենք անհանգստանալ: Պետք է խաղում սրություն մտցնենք եւ թույլ չտանք մրցակցին օգտագործել իր ողջ պոտենցիալը: Եթե մենք դա չանենք, ապա «Սիթին» ամեն ինչ գլխիվայր կշրջի: Ամեն ինչ պետք է վերահսկողության տակ պահենք»,_ Ինյեստայի խոսքերն է մեջբերում ՈւԵՖԱ-ի պաշտոնական կայքը: