Էնրիկե. Մոտենում ենք Կլասիկոյին փայլուն մարզավիճակով 

Լուիս Էնրիկեն Էյբարի նկատմամբ 2-0 հաշվով տոնած հաղթանակից հետո խոսել է գալիք շաբաթվա ընթացքում կայանալիք 2 կարևորագույն հանդիպումների մասին:

Իսպանիայի առաջնության 27-րդ տուրի շրջանակներում կայացած Էյբարի հետ խաղում 2-0 հաշվով հաղթանակ տոնելուց հետո կատալոնական Բարսելոնայի գլխավոր մարզիչ Լուիս Էնրիկեն մասնակցել է հետխաղյա մամլո ասուլիսի, որի ժամանակ նշել է. "Սա հատուկ հանդիպում էր մեզ համար, քանի որ մենք առաջին անգամ էինք հանդիպում անցկացնում Իպուրուա մարզադաշտում":

Մրցակցի ցուցադրած ֆուտբոլի մասին

"Մենք պետք է արդյունավետ գործենք յուրաքանչյուր խաղում: Մեր մրցակիցն այսօր դժվարություններ ստեղծեց մեզ համար: Էյբարը բավականին լավ հանդիպում անցկացրեց: Վստահ եմ, որ Էյբարը մյուս մրցաշրջանում ևս հանդես կգա Լա Լիգայում":

Սերխի Ռոբերտոյի մասին

"Չնայած նրան, որ մրցաշրջանի ընթացքում Ռոբերտոն քիչ խաղաժամանակ է ստացել, նա այսօր հիանալի հանդիպում անցկացրեց: Նա կատարեց բոլոր այն պահանջները, որոնք դրված էին նրա առջև: Կառանձնացնեմ այն, որ նա հիանալի էր գործում 2-րդ հարկում: Ցավում եմ, որ չեմ կարողանում նրան շատ խաղաժամանակ տրամադրել":

Ռեալի և Սիթիի հետ հանդիպումների մասին

"Մենք մոտենում ենք Էլ Կլասիկոյին փայլուն մարզավիճակով, սակայն այժմ պետք է կենտրոնանանք Մանչեսթեր Սիթիի հետ խաղի և քառորդ եզրափակիչ դուրս գալու մասին":