Էնրիկե. Այլևս միավոր կորցնելու իրավունք չունենք 

Բարսելոնայի գլխավոր մարզիչն ուրախ է առաջին հորիզոնական բարձրանալու կապակցությամբ, սակայն նշում է, որ ավելի կարևոր է մրցաշրջանի ավարտին լինել այդտեղ և գլխավերևում պահել չեմպիոնական գավաթը:

Կատալոնական Բարսելոնայի գլխավոր մարզիչ Լուիս Էնրիկեն Լա Լիգայի 26-րդ տուրի շրջանակներում կայացած Ռայո Վալյեկանոյի հետ հանդիպման ավարտից հետո խոսել է Բարսելոնայի խաղի և մրցաշարային աղյուսակում առաջին հորիզոնական բարձրանալու մասին:

"Մեր գլխավոր նպատակը առաջին հորիզոնականում հայտնվելն է ոչ թե հիմա, այլ մրցաշրջանի ավարտին: Մենք ունենք թիմային խաղ, ինչի շնորհիվ կարող ենք նվաճել բոլոր 3 գավաթները", - ասել է Էնրիկեն:

Հաղթանակի մասին

"Մենք գիտեինք, որ մեզ դժվար հանդիպում է սպասվում, այդ իսկ պատճառով մեկնարկային կազմում էին հայտնվել Չավին և Ինիեստան, ովքեր կարողացան վերահսկել գնդակը և ճեղքեր գտնել մրցակցի պաշտպանությունում":

Առաջին հորիզոնական բարձրանալու մասին

"Իհարկե, մենք ուրախ ենք առաջին հորիզոնական բարձրանալու կապակցությամբ, սակայն մեզ համար ավելի կարևոր է այդտեղ մնալ մինչև մրցաշրջանի ավարտը:Մենք այլևս միավոր կորցնելու իրավունք չունենք":

Անհատների մասին

"Մեսսին և Սուարեսը խաղ առ խաղ էլ ավելի լավ են համագործակցում և այսօր մենք տեսանք, թե ինչ տվեցին նրանք թիմին":

"Ռակիտիչը կարող է խաղալ կիսապաշտպանության բոլոր դիրքերում: Ես գոհ եմ նրա խաղից":

"Պիկեն գոլահար պաշտպան է: Նա կարողանում է ճիշտ պահին հայտնվել ճիշտ վայրում և օգտակար լինել թիմին":