Էնրիկե. Ռայոն ունի մեծ անհատականություն 

Բարսելոնայի գլխավոր մարզիչ Լուիս Էնրիկեն լավ տրամադրվածություն ունի Լա Լիգայի 26-րդ տուրի շրջանակներում կայանալիք Ռայո Վալյեկանոյի հետ խաղից առաջ: Մարզչի կարծիքով Պակո Խեմեսը ստեղծել է մի թիմ, որը կարողանում է համեստ բյուջեով խաղալ հիանալի ֆուտբոլ:

Այսօր կեսօրին Սյուտատ Էսպորտիվա մարզաբազայում կայացած մարզմանը հաջորդած մամլո ասուլիսի ժամանակ կատալոնական Բարսելոնայի գլխավոր մարզիչ Լուիս Էնրիկեն խոսել է Ռայո Վալյեկանոյի հետ սպասվող խաղի մասին` նշելով, որ ինչպես ինքը, այդպես էլ թիմի բոլոր ֆուտբոլիստները լավ տրամադրվածությամբ են դուրս գալու խաղադաշտ:

Ռայո Վալյեկանոյի մասին

"Յուրաքանչյուր մրցակից իր մեջ ունի մի որոշակի հավատ և վստահություն, սակայն Ռայո Վալյեկանոն իմ կարծիքով տարբերվում է բոլորից: Վստահ ենք, որ Ռայո Վալյեկանոն պայքարելու է գնդակին ավելի շատ տիրելու համար: Մենք պատրաստ ենք այդպիսի սցենարի: Եթե մենք չգործենք մեր ամբողջ ուժերով, իսկ Ռայո Վալյեկանոն խաղա իր լավագույն ֆուտբոլը, ապա մենք պետք է պատրաստ լինենք պարտվելուն":

Մրցակից թիմի գլխավոր մարզչի մասին

"Ես ժամանակին եղել եմ Պակո Խեմեսի խաղընկերը, սակայն երբեք չեմ պատկերացրել, որ նա կարող է լինել մի մարզիչ, ով այսքան միտված կլինի հարձակմանը: Խեմեսը Լա Լիգայի լավագույն մարզիչներից մեկն է, քանի որ ապացուցել է, որ կարող է արդյունավետ և վտանգավոր թիմ ստեղծել նաև շատ փոքր բյուջեով":

Հանդիպման մեկնարկի ժամի մասին

"Կարևոր չէ, թե ես հավանում եմ այդ ժամը, թե ոչ: Մենք խաղալու ենք մեր ֆուտբոլը և փորձելու ենք հաղթանակ տոնել":

Մեկնարկային կազմի մասին

"Շատ տարբերակներ ունենք Բուսկետսին փոխարինելու համար: Թե՜ Մասկերանոն, թե՜ Չավին, թե՜ Ռոբերտոն և թե՜ Ռակիտիչը կարող են խաղադաշտ դուրս գալ: Պեդրոն ևս հիանալի մարզավիճակում է"